Павлодар облысында жеті жасар Милананың өліміне қатысты іс бойынша алдын ала тыңдау өтті. Прокурор оқиғаға қатысты тергеу нұсқасын жариялады.

«2023 жылдың 17 қарашасында Бесқауға ауылында А. және Д.  үйдің дәлізінде отырып, өздері әкелген алкогольді ішімдіктерді іше бастаған. Біраз уақыттан кейін бір бөлмеде жыныстық қатынасқа түскен. Сол кезде мектептен оралған Милана кіріп келіп, анасы мен А.-ның әрекетін байқап қалған. Анасына ренжіген және ашуланған ол әкесіне анасының сатқындығы туралы айтып беретінін жеткізеді және айқайлап үйдің ішіне кіріп кетеді», – деді прокурор.

Қызының әрекетінен қорыққан Милананың анасы оны қуып жетіп, ұрып-соғып, есінен тандырып тастайды. Қыз еденге құлағаннан кейін анасы мен сүйіктісі оны тірі қалдырмауды жөн көреді. Олардың қылмыстық әрекетін қыздың інісі бақылап тұрған. Тергеушілердің айтуынша, ер адам Милананы белбеумен тұншықтырып өлтірген, содан кейін олар оның денесін сыртқа алып шыққан.

Айыпталушылар өмір бойына бас бостандығынан айырылуы мүмкін.

Еске сала кетейік, 17 қарашада Павлодар облысында жеті жасар Милана Давыдова жоғалып кеткен болатын. Полицейлер, Төтенше жағдайлар министрлігі мен еріктілер қызды үш күн іздегенімен, ол өлі күйінде табылған болатын.