Алматыда алдағы күндері жаңбыр жауып, оның соңы қарға ұласуы мүмкін. Әкімдік жүргізушілерге ескерту жасады, деп хабарлайды KYN.KZ ақпарат агенттігі әкімдікке сілтеме жасап.

Сонымен қатар қалада қауіпсіздік шаралары күшейтілді.

Әкімдіктің Telegram-дағы ресми арнасында жарияланған ақпарат бойынша, Алматыда 5-8 қараша аралығында жаңбыр, ал 7 қарашаға қараған түні қар аралас жаңбыр жауып, сынап бағанасы +2°C-қа дейін төмендейді.

"Су басу мен көктайғақтың алдын алу үшін 490 арнайы техника және 1120 жұмысшы жұмылдырылды. 6 қараша кештен бастап жолдарда 160 құмшашыратқыш кезекшілік етеді", - делінген ведомство хабарламасында.

"Қазгидрометтің" мәліметінше, 6 қарашада күн бұлтты болады, күндіз ауа температурасы +16°C болғанымен, жаңбыр жауады, түнде +8…+10°C. 7 қарашада жаңбыр соңы қарға ұласып, ауа температурасы +2°C- қа дейін төмендейді.