Прокурорлар кинопродюсерді екі жарым жылға соттауды сұрады. 28 жастағы Әнел Сартаева Алматыда бір адам қаза тапқан жол апатына кінәлі деп айыпталуда. Бүгін маусымда автобустың жол-көлік оқиғасына қатысты процестің жарыссөзі өтті, деп хабарлайды KYN.KZ ақпарат агенттігі КТК жаңалықтарына сілтеме жасап.

«Соттан Әнел Сартаеваны ҚР ҚК 345-бабының 3-бөлігінде көзделген қылмыстық құқық бұзушылықты жасағаны үшін кінәлі деп тануды, осы бап бойынша оны 2 жыл 6 айға бас бостандығынан айыру жазасын ең төменгі қауіпсіздіктегі қылмыстық-атқару жүйесінде өтеуді тағайындауды, сондай-ақ, 5 жыл мерзімге көлік құралын басқару құқығынан айыруды және бұлтартпау шарасын қамауда ұстауға өзгертуді сұраймын», - деді прокурор Ақерке Райханова.

Ал айыпталушының адвокаттары жауапкершілікті жеңілдететін мән-жайларды алға тартып, оны бас бостандығынан айырмауды сұрап отыр. Яғни судьядан оның бұл жағдайға өкінетінін, тоғыз айлық емшектегі сәбиі бар екенін және бұрын-соңды қылмыстық жауапқа тартылмағанын ескеруді өтінді.

 Әнел Сартаева бірінші күннен өз кінәсін толық мойындап, жәбірленушілерден кешірім сұраған. Марқұмның жақындары оған кешірім беріпті.

Еске салайық, жантүршігерлік жол апаты биыл жазда Алматының орталығында болған. Тергеу мәліметінше, Kia Sportage жүргізушісі №18 бағыттағы автобусқа жол бермей, ақыры қоғамдық көлік көше бойындағы дүкенге барып соғылған.

Апаттан 20 жастағы автобус жолаушысы қаза тапты. Тағы 24 адам жарақат алған. Сараптама қорытындысына сәйкес, кроссовер айтарлықтай баяу, яғни сағатына 20 шақырым жылдамдықпен жүріп келе жатқан.

«Ешқандай жаза марқұмды жақындарына қайтарып бермейді. Олар мұны түсініп, Әнелді кешірді. Оның ауыр жазаға тартылғанын қаламайды. Өзге зардап шегуішілер де солай. Сондықтан соттан адамгершілік танытып, бас бостандығынан айырмайтын жаза тағайындауды сұраймын», - деді адвокат Арман Қабенов.