Қызылорда қалалық сотында 16 жастағы оқушыны жезөкшелікпен айнылысуға мәжбүрлеген күдіктіге қатысты қылмыстық іс қаралды, деп хабарлайды KYN.KZ ақпарат агенттігі. 

Соттың мәліметінше, сотталушы Ж жәбірленушінің кәмелет жасына толмағанын біле тұра, оны бірнеше рет жезөкшелікпен айналысуға мәжбүрлеген. Осылайша ол пайда тапқысы келген.

Прокурор соттан күдіктіні кінәлі деп танып, 4 жыл 6 ай мерзімге бас бостандығынан айыруды сұрады. Ал жәбірленушінің өкілі сотталушыны кешіретінін және жазаға қатысты мәселені соттың қарауына қалдыратынын мәлімдеді.

Сотталушының кішкентай баласының болуына байланысты сот жазаны жеңілдететін мән-жай ретінде таныды. 

“Сот үкімімен сотталушы кінәлі деп танылып,  4 жыл 6 ай мерзімге бас бостандығынан айыру жазасы тағайындалды”, – делінген сот хабарламасында. 

Үкім заңды күшіне енген жоқ.

Айта кетсек, осыған дейін Қызылордада 16 жастағы оқушыны сексуалдық құлдықта ұстаған тағы бір күдіктеге сот үкімі шыққаны туралы жаздық.