Оқушыларға қысқы демалыс басталды: министрлік мәлімдеме жасады
- автор Томирис Тоныкөк
- 30 желтоқсан, 2024
- 126
Мектептерде қысқы демалыстардың басталуына байланысты Оқу-ағарту министрлігі мәлімдеме жасады, деп хабарлайды KYN.KZ ақпарат агенттігі.
«Біртұтас тәрбие» бағдарламасы аясында Оқу-ағарту министрлігі қысқы демалысты ұйымдастыру үшін өңірлерге ұсыныстар жіберген. Бұл ұсыныстар қауіпсіздік сабақтарын, білім беру, спорттық, мәдени және шығармашылық іс-шараларды қамтиды.
“Балалардың қауіпсіздігін қамтамасыз ету басым міндеттердің бірі . Әсіресе мереке күндері оқушылардың отбасымен уақыт өткізуіне ерекше көңіл бөлінеді.
Жол-көлік оқиғаларының алдын алу мақсатында көшелерде, сырғанақтарда, мұз айдындарында, су қоймалары маңында және адамдар көп жиналатын орындарда, соның ішінде жәрмеңкелер мен жаңажылдық шыршаларда қауіпсіздік шараларын сақтау қажет.
Сондай-ақ өрт қауіпсіздігі де маңызды рөл атқарады. От пен электр құрылғыларын қолдану кезінде, жаңажылдық гирляндалар, шамдар мен бенгал шамдарын пайдаланғанда қауіпсіздік ережелерін қатаң сақтау керек” делінген министрлік хабарламасында.
Бұл оқу жылында қысқы демалыс 30 желтоқсаннан 8 қаңтарға дейін 10 күнге созылады. Бірінші сынып оқушылары үшін 2025 жылдың 10-16 ақпан аралығында 7 күн қосымша демалыс беріледі.