Ақмола облысында жол талғамайтын көлікті ағыс алып кеткен. Ол су басқан учаскені кесіп өтпек болған, деп хабарлайды KYN.KZ ақпарат агенттігі.

Оқиға 5 сәуірде "Астана-Атбасар-Жақсы-Рузевка-Сарыкөл-Қостанай-РФ шекарасы" тас жолының 963 шақырымында орын алған. 

"Жүргізуші шектеуге қарамай полиция бекетін айналып, су басқан учаскені кесіп өтпек болған. Салдарынан көлікті ағыс алып кетті", – деп түсіндірді Ақмола облыстық полиция департаментінің баспасөз қызметі. 

Көлікте үш адам болған. Екі жолаушыны полиция мен ТЖМ қызметкерлері құтқарып қалған. Ал жүргізушінің мәйіті түнде табылды.