Синоптиктер 14 шілдеге арналған ауа райы болжамын жасады, деп хабарлайды KYN.KZ ақпарат агенттігі. 

Еліміздің батысында, солтүстік-батысында, солтүстігінде, шығысында және оңтүстік-шығысындағы таулы аудандарда найзағай ойнап, жаңбыр жауады.

"Еліміздің солтүстік-батысында, солтүстігінде және шығысында бұршақ жаууы мүмкін. Шығыста нөсер жаңбыр жауады деп күтіледі. Еліміздің қалған аумағында антициклон әсерінен жауын-шашынсыз ауа райы сақталады", - дейді "Қазгидромет" РМК.

Қызылорда облысында шаңды дауыл тұрады деп болжануда. Ал күндіз Атырау, Жамбыл, Жетісу, Батыс Қазақстан облыстарында, сондай-ақ Алматы облысының батысында, солтүстігінде, Ақтөбе облысының оңтүстігінде және Ұлытау облысында сынап бағаны +35...+39 градусты көрсетіп, аптап ыстық болады деп күтіледі.

Түркістан облысында 14 шілдеде сынап бағаны +40 градусқа дейін, ал Маңғыстау облысында + 41 градусқа дейін көтеріледі деп болжанады.