Ақмола облысында заңсыз тергеліп, үш жыл бойы үйінен шыға алмаған кәсіпкерге Қаржы министрлігі 53,8 млн теңге материалдық және моральдық залал өтеді, деп хабарлайды KYN.KZ ақпарат агенттігі облыстық сотының баспасөз қызметіне сілтеме жасап.

Ақмола облысының сот алқасына кәсіпкер шағым түсірген. Ол қаржы министрлігі, полиция департаментінің заңсыз қудалауы салдарынан келген залалды өтеп беруді сұраған. Сондай-ақ полицияның бұқаралық ақпарат құралдары арқылы өзінен кешірім сұрауын талап еткен.

"2019 жылы қазанда полиция ЖШС басшысы, кәсіпкердің үстінен аса ауыр және ауыр қылмыстар жасады деп қылмыстық іс қозғаған. Күдіктіге қылмыстық топ құрды және бөтен адамның мүлкін ұрлады деген айып тағылған", - дейді сот.

Салдарынан күдікті кәсіпкер үш жыл бойы үйқамақта отырған. Тек үш жылдан соң жасалған қылмыс дәлелденбей, тергеу тоқтатылған. Үш жылда шығынға белшемнен баттым деген кәсіпкер сотқа шағым түсірген.

"Ол қаражатсыз қалғанын айтып, сотқа жүгінді. 2021 жылы ЖШС банкрот деп танылды, 2023 жылы құжаттарды уақтылы бермегені үшін оған жер пайдалану құқығын ұзартудан бас тартылды. Бірінші сатыдағы соттың шешімімен талап ішінара қанағаттандырылды. Кәсіпкердің пайдасына 14 млн теңге материалдық залал, 16,8 млн теңге жоғалтқан жалақы сомасы, 9 млн теңге моральдық зиян өтемақысы өндірілді", - дейді облыстық сот.

Ал осы жылдар ішінде адвокатқа 28 млн теңге шығынданған кәсіпкерге сот 14 млн теңге өндіру туралы шешім шығарды.