Түркістан облысының Келес аудандық сотында дамуында ауытқуы бар 24 жастағы жігіттің зорлануына қатысты іс бойынша сот үкімі шықты, деп хабарлайды  KYN.KZ ақпарат агенттігі.

Бұл оқиға туралы 2025 жылғы наурызда "НеМолчи.kz" қорының жазбасынан белгілі болды. Ұйымның деректеріне сүйенсек, даму деңгейі 4 жастағы баланың деңгейіне сәйкес 24 жастағы жігіт жылдар бойы туысқандары мен көршілерінің зорлық-зомбылығына ұшыраған.

Жәбірленушінің анасы қылмысқа алты адамның, соның ішінде кәмелетке толмағандардың да қатысы бар екенін айтқан. Алайда айыпталушылар орындығында жігіттің кәмелетке толған үш туысқаны ғана отырды.

Сот отырысы жабық режимде өтті. Екі айыпталушы бірнеше рет жасалған топтық зорлау бойынша (ҚК-нің 121-бабы 2-бөлігі 1 және 4-тармақтары), үшіншісі топтық зорлау және ұрлық бойынша (ҚК-нің 121-бабы 2-бөлігі 1-тармағы; ҚК-нің 188-бабы) айыпталды. Сот шешімімен барлығы 9 жылға бас бостандығынан айырылды. Сонымен қатар, сотталғандар жәбірленушіге 5 миллион теңге көлемінде өтемақыны бірлесіп төлеуге міндеттелді.

Адвокаттың айтуынша, жәбірленушінің анасы үкімге қанағаттанбады. Апелляция беріп, жазаны күшейту мәселесі анасының шешіміне байланысты болады.

Қазір жәбірленушінің отбасы ауыл тұрғындарының қысымына ұшырап отыр.