Шабуыл қалай болған

Баланың анасы Назгүл Сандыбаеваның айтуынша, ұлы үй ауласында ойнап жүрген кезде оған бірнеше ит жабылған. Әйелдің сөзінше, баланы көршісі айқайын естіп барып құтқарып қалған. Бұл туралы «Мой город» басылымы хабарлады.

«Бес жасар ұлымның денесінде сау жер қалмады десе болады: иттер санының жамбасын қатты талаған, арқасын жыртып кеткен, қолы мен саусақтарын тістеген», — деді Назгүл.

Оның айтуынша, бала көптеген жарақат алған және қазір дәрігерлердің бақылауында жатыр.

Орал әкімдігі не деді

Орал қаласының әкімдігі қадағалаусыз жүрген жануарларды аулау, зарарсыздандыру, вакцинациялау, сәйкестендіру және уақытша ұстау жұмыстары Қазақстан Республикасының «Жануарларға жауапкершілікпен қарау туралы» заңы аясында жүргізіліп жатқанын мәлімдеді.

Әкімдік мәліметінше, сәуір айының басынан бері қалада 283 қаңғыбас жануар ауланған. Оның ішінде 205 ит пен мысық зарарсыздандырылып, вакцина салынып, сәйкестендірілгеннен кейін қайтадан табиғи мекендеу ортасына жіберілген. Ал бұған дейін тіркелген 78 жануар қайта вакцинациядан өтіп, қайтадан көшеге жіберілген.

Әкімдік өкілдері жануарларды аулау жұмыстары тұрғындардың шағымдары мен жануарлар шоғырланған орындарға жүргізілген мониторинг негізінде, гумандық тәсілмен атқарылатынын атап өтті.

Сондай-ақ қала билігі үй жануарларының иелерін оларды күтіп-ұстау және серуендету ережелерін сақтауға, жануарларды көшеде қараусыз қалдырмауға шақырды.

 Қанша тістеу дерегі тіркелген

Санитариялық-эпидемиологиялық қызметтің мәліметінше, сәуір айында қалада жануарлардың адамды тістеуіне қатысты бес жағдай тіркелген. Тұрғындардың шағымынан кейін екі жануар карантинге алынған.

Ал зардап шеккен баланың анасы аудан тұрғындары үйлер мен балалар алаңдарының маңында агрессивті ит топтарына жиі тап болатынын айтты.

 Бұл жағдай неге қоғамда резонанс тудырды

Батыс Қазақстан облысындағы бұл оқиға Қазақстанда қадағалаусыз жануарларға қатысты заңнамаға өзгерістер енгізу мәселесі қызу талқыланып жатқан уақытта болды.

2026 жылғы 19 мамырда Қазақстан Президенті Қасым-Жомарт Тоқаев «Жануарларға жауапкершілікпен қарау туралы» заңға енгізілген түзетулерге қол қойды. Өзгерістерге сәйкес, елде ОСВВ — «аулау, зарарсыздандыру, вакцинациялау, қайта жіберу» жүйесінен бас тартылып, жануарларды қайта көшеге жібермейтін жаңа аулау жүйесіне көшу қарастырылған.

Бұған дейін Орал әкімдігі қадағалаусыз жануарларды аулау бойынша келісімшартты Оркен ЖШС-мен жасаған. Компанияның негізгі қызмет түрі — етті өңдеу және консервілеу. Келісімшарт құны 9 миллион 396 мың теңгені құраған.

Техникалық сипаттамаға сәйкес, мердігер жануарларды аулап, уақытша ұстау орындарына жеткізу және оларды жою жұмыстарымен айналысуы тиіс. Жыл соңына дейін шамамен 2 мың жануарды аулау жоспарланып отыр.