Қазақстанның үш облысының тұрғындарына сел жүру қаупі ескертілді, деп хабарлайды KYN.KZ ақпарат агенттігі.

"Қазселденқорғау" мекемесінің мәліметінше, 3-5 шілде аралығында Алматы, Жамбыл және Жетісу облыстарының таулы және тау бөктеріндегі аудандарында күннің күрт ысуы мен нөсер жауын күтіледі.

"3-5 шілде аралығында ауа температурасының жоғары болуы және нөсер жаңбырлардың болжануына байланысты тау беткейлерінен су қарқынды ағып, өзендердегі су деңгейі көтеріледі. Соның салдарынан жер көшкіні мен сел жүруі мүмкін", – делінген "Қазселденқорғау" хабарламасында.

Мамандар кей учаскелерде сел жүру және көшкін жүру қаупі сақталатынын ескертеді.

"Аталған облыстардың тұрғындары мен қонақтарынан сақтық шараларын сақтауды сұраймыз", - делінген хабарламада.

Бұған дейін Алматыдағы Наурызбай ауданының тұрғындарын сел жүру қаупіне байланысты эвакуацияланып жатқаны туралы жазған едік.