Алайда мұндай жағдайда болған оқиғаның себептерін анықтау ғана маңызды емес. Мемлекеттік институттардың төтенше жағдайға қаншалықты жедел әрекет ете алатыны да аса маңызды: іздестіру жұмыстарын жүргізу, отбасыларға көмек көрсету, жауапты тұлғаларды анықтау және тергеу барысы туралы қоғамға ашық ақпарат беріп отыру.

Оқиға болған күні-ақ тиісті шаралар дереу қолға алынды.

Мемлекет басшысы қаза тапқандардың туған-туыстары мен жақындарына көңіл айтып, Үкіметтік комиссияға қайғылы оқиғаның мән-жайын анықтау және әскери қызметшілердің отбасыларына көмек көрсету үшін барлық қажетті шараларды қабылдауды тапсырды.

25 қыркүйек Президенттің Жарлығымен жалпыұлттық аза тұту күні болып жарияланды. Үкіметтік комиссия жұмысын тікелей Маңғыстау облысында бастады. Іздестіру-құтқару жұмыстары тәулік бойы жүргізілді. 25 қыркүйек күні таңғы сағат 09:15 шамасында хабар-ошарсыз кеткен деп есептелген екі әскери қызметшінің денесі табылды.

Сонымен қатар сотқа дейінгі тергеп-тексеру басталды.

Сол күні таңертең Бас прокуратура қызметтік міндеттеріне салғырт қарады және жеке құрамның қауіпсіздігін тиісті деңгейде қамтамасыз етпеді деген күдікке ілінген лауазымды тұлғалардың анықталғанын хабарлады. Тергеушілер оқиға болған жерді қарап, 30-дан астам әскери қызметшіден жауап алды, құжаттар мен бейнематериалдарды тәркіледі, 12 сараптама тағайындады.

Арада небәрі екі сағат өткенде ІІМ Қазақстан Республикасы Қарулы Күштерінің жоғары және аға командалық құрамындағы бес лауазымды тұлғаның ұсталғанын хабарлады.

Олардың барлығына күдікті мәртебесі берілді. Тергеу жалғасып жатыр. Оның ішінде іс-әрекеттеріне құқықтық баға берілуі тиіс тұлғалардың ықтимал қосымша тобы да анықталуда.

Қаза тапқан әскери қызметшілердің отбасыларына қолдау көрсету бойынша да жеке жұмыс басталды. Үкіметтік комиссия материалдық және өзге де көмек көрсетуді қамтамасыз етуді тапсырды, ал Қорғаныс министрлігі материалдық және психологиялық қолдау көрсетілетінін мәлімдеді.

Тағы бір маңызды жайт — қайғылы оқиға туралы ақпарат қоғамнан жасырылған жоқ.

Іздестіру жұмыстары мен тергеу жүргізілуіне қарай ресми органдар қаза тапқандар мен хабар-ошарсыз кеткендердің саны туралы нақтыланған ақпаратты, іздестіру операциясының барысын, тергеудің алғашқы нәтижелері мен кейінгі ұсталғандар туралы хабарлап отырды. Халықтан ештеңе жасырылған жоқ.

Мемлекеттік механизм қайғылы жағдай алдында тоқтап қалған жоқ. Біреулер іздестіру және тергеу жұмыстарымен айналысып жатыр, енді біреулер қаза тапқандардың отбасыларына қолдау көрсетуде, ал үшіншілері күнделікті міндеттерін орындауды жалғастыруда.

Мұнда мына нәрсені түсіну маңызды: иә, қайғылы жағдай орын алды. Оны елеусіз қалдыруға, ұмытуға немесе тезірек артта қалдыруға болмайды. Себептерін анықтап, жауапкершілікті белгілеу және мұндай жағдайдың қайталанбауы үшін тиісті қорытынды жасау қажет. Бірақ сонымен бірге ел тоқтап қалмауы керек.

Адамдар жұмысын жалғастыруда. Мемлекеттік органдар шешімдер қабылдауды жалғастыруда. Экономика, мектептер, ауруханалар, кәсіпорындар, көлік жүйесі — мұның бәрі тоқтатылмайды. Миллиондаған адамның өмірі жалғасып жатыр және мемлекеттен тұрақты әрі үздіксіз жұмысты талап етеді.

Бәлкім, қайғылы жағдайға деген кемел көзқарас дегеніміз де осы шығар: қаза тапқандарды еске алу, олардың отбасыларына қолдау көрсету, барлық сұрақтарға жауап алу — және сонымен бірге алға қарай жылжу.

Өйткені қайғы мен жауапкершілік өмірдің жалғасуына қайшы келмейді. Керісінше, мемлекеттің жауапкершілігі — ең қиын күндердің өзінде елдің тұрақтылығын сақтап, оның қалыпты жұмысын жалғастыруды қамтамасыз ету.