Батыс Қазақстан облыстық сотының баспасөз қызметінің хабарлауынша, мекеме қызметкерді жұмыс орнында үш сағаттан астам болмағаны үшін жұмыстан шығарған.

Алайда тәртіптік жаза қолданар алдында жұмыс беруші одан жазбаша түсініктеме сұрамаған. Бұл - еңбек заңнамасында қарастырылған міндетті рәсім.

"Сот жұмыс берушінің әрекеті еңбек заңнамасының талаптарына қайшы келеді деген қорытындыға келіп, жұмыстан босату туралы бұйрықты заңсыз деп таныды", - делінген хабарламада.

Нәтижесінде қызметкер бұрынғы лауазымына қайта барды. Оның пайдасына мәжбүрлі түрде жұмысқа шықпаған уақыты үшін 2 315 515 теңге мөлшерінде орташа жалақысы, сондай-ақ өкілдің көмегіне ақы төлеу шығындары ретінде 350 000 теңге өндірілді.

Сот шешімі заңды күшіне енген жоқ.