Ақорданың баспасөз қызметі хабарлағандай, Нұрсұлтан Назарбаев халыққа мемлекеттік қызмет көрсету ісінің сапасын арттыру және жеделдету үшін цифрландыру бағдарламасын жүзеге асырудың маңызды екенін ерекше атап өтті. “Шымкент ірі мегаполиске айналады. Мұнда жаңа жобалар іске асырылуда. Шымкенттіктердің еңбекқорлығы – қаланы дамытудың кепілі. Жұмыстың ең маңызды бағыты – шағын және орта бизнес. Оны дамыту үшін тиісті қолдау көрсету қажет”, – деді Қазақстан президенті. Сондай-ақ, елбасы мегаполистегі тұрғын үй құрылысының және әлеуметтік инфрақұрылымының жоспарымен танысты. Назарбаевқа қала нысандарының құрылысы және қайта жөндеу жұмыстары жөнінде мәлімет берілді.