Петропавлда ұлы ақындарға арналған ескерткішке мінген масайған жастарды полицейлер ұстады, деп хабарлайды KYN.KZ ақпарат агенттігі.

Оқиға 1 қаңтар күні кешке Тәуелсіздік стеласының маңындағы мұз қалашығында орын алған. Жас жігіттердің қоғамдық тәртіпті бұзған әрекетін сол маңда серуендеп жүрген қала тұрғындары байқап қалған. Олар ұлы Абай мен Пушкиннің ескерткішіне мініп, суретке түскен.

Жаяу жасақ оларды бейнебақылау инспекторларының көмегімен ұстады.
 
Оларға қатысты қоғамдық орында мас күйде болғандары және ұсақ бұзақылық үшін хаттамалар толтырылды.

Сонымен қатар біраз уақыт бұрын көрші елдердің бірінен Петропавлға келген жастардың үшеуінің де Қазақстан аумағында болу мерзімі аяқталғаны анықталды. Олар бұл бұзушылықтары үшін де әкімшілік жауапкершілікке тартылатын болады.