1 наурыздан бастап Қазақстанда түрлі салада бірнеше маңызды жаңа заң күшіне енеді, деп хабарлайды KYN.KZ "31 арнаға" сілтеме жасап.

Өзгерістердің бірі жаңа Салық кодексіне қатысты. 1 наурыздан бастап салық органдарына бұрынғы салық режимінде қалу немесе өзгерту туралы хабарлама жібермеген барлық салық төлеуші автоматты түрде стандартты салық режиміне ауысады.

Банк секторында да өзгерістер күтіп тұр. Барлық коммерциялық банк енді тұрғын үй жинақ жүйесіне қатыса алады. Сарапшылардың пікірінше, бұл банктер арасында бәсекелестікке оң әсерін береді.

Сонымен қатар тәуекелдерді басқару және клиенттердің құқығын қорғау жүйесі енгізілуде. Несие беру талаптары күшейтілді. Өтеу мерзімі өтіп кеткен несиесі бар азаматтарға банктер жаңа кредит беруден бас тартуы мүмкін.

Отбасы құқығына қатысты заңнамада да өзгерістер бар. Мүлікті бөлу кезіндегі дау бойынша іс жүргізудің үш жылдық мерзімі енді ажырасу күнінен емес, мүлікке қатысты құқықтың бұзылған күнінен бастап есептеледі. Алимент ережелері де жаңартылды.

"Мысалы, бұрын шетелде тұратын адамның табысын анықтау өте қиын болатын. Ол мұнда тұрмайтындықтан оның өңір бойынша орташа жалақысын анықтау мүмкін емес болатын. Қарызды қалай есептеу керектігі жөнінде сұрақтар туындайтын. Енді, мысалы, сот мұндай адамдарға белгіленген мөлшерде ақшалай айыппұл сала алады", - деді адвокат Евгений Яворский.

1 наурыздан бастап дәрігерлерге қатысты зорлық-зомбылық немесе сондай қауіп төндірген тұлғаларға қатаң жаза енгізіледі, егер қылмыс ауыр дене жарақатын салу немесе кісі өлтірумен байланысты болса, ірі көлемде айыппұлдан бастап 12 жылға дейін бас бостандығынан айыру жазасы қарастырылады. Бұл шаралар медицина қызметкерлеріне шабуылдың жиілеуіне байланысты енгізілді.

"Кейде, былайша айтқанда, жақын адамынан айырылған немесе қандай да бір емдеу мәселелерімен байланысты дәрігерге зиян келтіру ниеті туындайды, бірақ бәрі заң шеңберінде шешілуі керек. Дәрігер құдай емес, олар ауруды әрдайым емдеп жаза алмайды. Мұны түсіну маңызды. Сондықтан, өкінішке қарай, бұл тек Қазақстанда ғана емес, әлемнің көптеген елдерінде де өткір мәселе", - деп атап өтті денсаулық сақтау саласындағы сарапшы Вячеслав Локшин.

Ал наурыздың басты оқиғасы – жаңа Конституция бойынша референдум. 15 наурызда қазақстандықтардың Конституция жобасын қолдауға немесе қарсы дауыс беруге құқығы бар.