Үш дүркін әлем чемпионы әрі Олимпиада ойындарының жүлдегері Назым Қызайбай Гуйян қаласында ұйымдастырылған бокстан әлем кубогының жеңімпазы атанды. Бұл туралы Спортты дамыту дирекциясы мәлім етті.
54 келіге дейінгі салмақ дәрежесінде сынға түскен отандасымыз финалда Италия спортшысы Сирине Чараабимен қолғап түйістірді. Қарсыласы әлем чемпионаттарының екі дүркін жүлдегері саналады.
Жекпе-жек барысында Назым барлық раундта сенімді өнер көрсетіп, төрешілер шешімімен 4:1 есебінде басым түсті. Осылайша қазақ боксшысы жарыстың алтын жүлдесін иеленді.
Финалға дейін Қызайбай бірнеше мықты қарсыласын жарыс жолынан шығарды. Алғашқы кезеңде Париж Олимпиадасының қола жүлдегері, оңтүстіккореялық Им Э Джиді 4:1 есебімен жеңсе, ширек финалда Польша өкілі Виктория Рогалинсканы 5:0 есебімен ұтты. Ал жартылай финалда Таиланд боксшысы Натнича Чонгпронгклангтан 3:2 есебімен басым түсті.
Еске салсақ, Назым Қызайбай өткен жылы Астанада ұйымдастырылған әлем кубогында 48 келі салмақ дәрежесінде чемпион атанған еді.
Келесі мақала
Президент Еуроодақ басшыларымен келіссөздер өткізеді
Ұқсас жаңалықтар
